Inang Tandag

Inang Tandag

by: Tonie Jade M. Mendez

Hiyas ikaw sa subanganang dagat

Luyo nan kayano, isa buwawanong kaanyag

An imo katahum na makaluluyag

Kilhanan na sa Diyos ikaw pagabulahan

Sugod pa sa sugod pagpangga mo tagpangita na

Kay mayumo sah an maghuya sa imo sabakan

Dimodo, ikaw gayod pagakaluyagan

Sin’o man ugaling an moduwd sa imo sikihan

Gikan kan Manobo na imo unang anak

Kainit nan guma mo, siya yamatutuan

Yakatagamtam siya nan matam-is mong pagpangga

Dimano, ikaw iya gihimaya sa tanan.

Hampan isa ka adlaw na ni ngani dahumi

Isa ka usog na si Kastila inmabot sa imo kinabuhi

Buwak nan sulting-pasalig iya impamuhi

Pero yaon bayay mga tunok nan ini na wara hibaw-i

Sa alima niya yaglantayog kaw sa mga silingan

Hapan, haod nila, ikaw gapos sa puthaw’n kadina

Ulipon, luyo sa kalayog sa iban

Luha nan pagtiyaho imo impamuhunan.

Pero kaisog nan mga anak mo kahibuwongan

Taman sa ila mahimo, ikaw indapigan

Hasta kinabuhi andam na nila ihalad

Mahatag da lamang sa imo an kagawasan.

Isa ka adlaw, yaoy min-abot gikan sa habagatan

Si Moro kuno amo an iya pangaan

Kinmad-on dakan makigsangkaan

Hangtod sa amoy imo inkapukanan.

Sa taas na panahon ikaw yag-antos

Sa higdaan tungod sa sakit nan kaalaut

An sa unang malayog-layog ug malig-on

Yakadangat nan ini na pagkaubos.

Hapan an Diyos sa imo wara gihapun mobiya

Luyo sa imo pag-antus, ikaw gikaluy-an

Ikaw iya gipuspusan nan grasya Niya

Gikan sa kalupasay iya kaw inbatyag

Kuman, yaamgo mo na an una na ang-ang

An ang-ang pasingod sa kadaugan

Luyo sa pag-antos, yahinang kaw ini kuman

Mabuhi kaw, Inang Tandag!!!